شمس

شمس - للشاعر علي السقاي

بحر جروحك ظل يتماوج .. يحسين من دماك
مثل طيورالنورس نزلت .. يمك هالاملاك
هذا يغطيك بجنحانه .. ذاك يون وياك
والشمس تسامحها تمنت .. زادت من ضماك

شمس العاشر شافت منظر وانتا على التربان .. بالمصرع نايم وجروحك غطتها الميدان
بس هاي شفافك تتحرك ومغمض الأجفان .. شتقول انت بهاي اللحظة ما يمك انسان
قامت تستعجل مغربها وتصغي لك بأحزان .. سمعت همسة تصم الدنيا يلتهمس عطشان
الشمس بحزن احترقت اكثر وتقلك رحماك
و اتمنت لو شانت تقدر تمطر فوق شفاك

بحر جروحك ظل يتماوج .. يحسين من دماك
مثل طيورالنورس نزلت .. يمك هالاملاك
هذا يغطيك بجنحانه .. ذاك يون وياك
والشمس تسامحها تمنت .. زادت من ضماك

محتارة الشمس شما تحزن بيها تزيد النار .. فوق ضماك تزيدك اكثر و تقدم أعذار
مو وقت الليل الياخذها والمغرب ما صار .. و تشوف الشمر و تتلفت بين يمين يسار
تبحث عن غيمة تمر بيها مو لجل الأمطار .. بس حتى الذبحك ما تنظر و تغض الأبصار
لكن هذا عليها تقدر بالمذبح تلقاك
وبيوم المحشر يم ربها تشهد ضد عداك

بحر جروحك ظل يتماوج .. يحسين من دماك
مثل طيورالنورس نزلت .. يمك هالاملاك
هذا يغطيك بجنحانه .. ذاك يون وياك

الشمس تسامحها تمنت .. زادت من ضماك

هالامواج المرجانية من النحر المذبوح .. فيض من الرحمة و يتنازف لو دمك مسفوح
الله تولى القبض بإيده واستقبل هالروح .. عبرة روحك فوق جروحك ظل جسمك مطروح
كسرت عين الشمس انوارك فوق الرمح تلوح .. وعلى مصابك أُفق العالم كل غروب ينوح

يا من صار غيابك مَشرق والنور بذكراك
صلى الحزن عليك وسلم يحسين وحياك

بحر جروحك ظل يتماوج .. يحسين من دماك
مثل طيورالنورس نزلت .. يمك هالاملاك
هذا يغطيك بجنحانه .. ذاك يون وياك
والشمس تسامحها تمنت .. زادت من ضماك