قصة ألم

للشاعر - السيد عبد الخالق المحنة

قصة ألم بمتوني .. يرويها دمع عيوني
والتكره تشوفه العين .. شفته لمن عفتوني
جم قصه تتراوالي  .. يوم الغبت يالغالي
جابولي رأسك يا حسين .. شفته وصحت يالوالي
يضرب ثناياك بعود .. قصده يعذب حالي
كل نظره من الشمات .. سيف وقطع دلالي
مضرب مثل خدري چان .. محد يشوف خيالي
وانده يا راعي الجفين .. ترضى العدا يشوفوني
قصة ألم بمتوني .. يرويها دمع عيوني
والتكره تشوفه العين .. شفته لمن عفتوني
يم جسمك تعنولي .. هذا الأخو قالو لي
خايف اجرحك لو اقول .. يبن امي شافوا طولي
زينب ياخو زينب ليش .. عدوانك يصيحولي
عفت الحراير بالخوف .. من ارجع شيحچولي
ام الرضيع بيا حال .. و بلا شعور تلولي
واسمع يا خويه الايتام .. عن شخصك يسألوني
قصة ألم بمتوني .. يرويها دمع عيوني
والتكره تشوفه العين .. شفته لمن عفتوني
يبن امي انهض ليـّه .. قوه وصبر مابيــّه
ما اعرف اركب عالنوق .. يا خويه صعبه اعليّـه
افهم كلام العدوان .. ما صدقوا مسبيه
واحد يقل للثاني .. هيه العقيله هيه
عالمشرعه ظل مطروح .. البيرق و راعيـّه
دارت يا خويه الايام ..عالهزل يركبوني
قصة ألم بمتوني .. يرويها دمع عيوني
والتكره تشوفه العين .. شفته لمن عفتوني
خويه العلم عليته .. چم ظالم تحديته
رايد يشوف دموعي .. اختك ولا راويته
يسألني وين الوالي .. يا بت علي ناسيته
خويه واجاني السلاب .. عني ابتعد ناديته
ارجع اخويه ما غاب .. هسه يعود البيته
وين الأخو غايب وين .. غايتهم يجرحوني
قصة ألم بمتوني .. يرويها دمع عيوني
والتكره تشوفه العين .. شفته لمن عفتوني
خويه الوقت دولبني .. درب اليسر تعبني
كلما اصيحن عباس .. صوت الشمر جاوبني
رأسك يصد اعليه .. عاتبته و يعاتبني
اختك انا وما ذليت .. بس فقدك يعذبني
كون انته حاضر وياي .. من يقدر يسلبني
حسبالي يوم الكلفات .. من انده تحضروني
قصة ألم بمتوني .. يرويها دمع عيوني
والتكره تشوفه العين .. شفته لمن عفتوني