ساقي الماي
يلي تريد تناشده
موسى بن جعفر والده
تاج المكارم عنده
حملة أبادة ضالمة
ضد حيدر و ضد فاطمة
و الحاقد أعلن حقده
من بني الزهرة ما صفى
اللي أنذبح و اللي أختفى
كل فرد عاش بلده
و القاسم يدير النظر
قرر بعد ذاك الخطر
يترك مدينة جده
جرح المحتار .. يترك آثار .. تسكن يا دار .. يا ساقي الماي
حاير تدير العين .. علمنا أهلك وين .. يا ساقي الماي
دمعي الحيران .. يروي الاحزان .. وين الاوطان .. يا ساقي الماي
يسأل عليك منين .. علمنا أهلك وين .. يا ساقي الماي
من موطن أجداده أرتحل
عاف الحبايب و الاهل
لأرض العراق اتعنى
ما يندل وين الدرب
و المثله يتغرب صعب
إلمن يسولف حزنه
بعيونه ينشاف الدمع
مكسور خاطر منفجع
و الخطوة حسرة و ونه
وحدة صفا و حن القلب
ما ينحمل دمع الغرب
يشوف الاهل يتمنى
وحدك ظليت .. تمشي إليا بيت .. لأهلك حنيت .. يا ساقي الماي
نار الغرب نارين .. علمنا أهلك وين .. يا ساقي الماي
دمعي الحيران .. يروي الاحزان .. وين الاوطان .. يا ساقي الماي
يسأل عليك منين .. علمنا أهلك وين .. يا ساقي الماي
للبير إجى و من شافته
بنت الكرام أتلقته
شافت الغيرة بدمه
أهلاً وسهلاً حيته
و الدار أبوها جابته
طبع الكرام تكرمه
بعد الضيافة ينسأل
عن اسمه و أمنين الأصل
لازم يغير أسمه
أسمه الغريب و للأسف
تتخفى أعلام الشرف
من ظلم هاي الأمة
صرت الساقي .. و الحكمة بهاي .. تبجي على الماي .. يا ساقي الماي
نذكر مصاب حسين .. علمنا اهلك وين .. يا ساقي الماي
دمعي الحيران .. يروي الاحزان .. وين الاوطان .. يا ساقي الماي
يسأل عليك منين .. علمنا أهلك وين .. يا ساقي الماي
فعله فعل طيب نسب
بيه سيد القوم أنعجب
قرر يزوجه بنته
أصبح له بيت و عايلة
و يتمنى بس شوفة هله
جلمة وطن جارحته
بس طفلة عنده بدنيته
صارت حياته و سلوته
و يكلها نرجع يمتى
من ينظر الطفلة يون
ما ينمسح دمع الحزن
يبجي و يون بسكتة
قلب المألوم .. يفرح يا يوم .. ما ترجع دوم .. يا ساقي الماي
يالعاشرت جرحين .. علمنا أهلك وين .. يا ساقي الماي
دمعي الحيران .. يروي الاحزان .. وين الاوطان .. يا ساقي الماي
يسأل عليك منين .. علمنا أهلك وين .. يا ساقي الماي
من حس منيته قربت
الطفلة نادها و إجت
علمها أسمه و سره
يا بويا جبري خاطري
لأرض المدينة سافري
أمي إلج منتظرة
لو شافتج يا مدللة
يا ريحة القاسم هله
و تموت من الحسرة
شميها يا بويا إلي
و شميني كل ريحة هلي
شيطفي هاي الجمرة
بعد الغياب .. ظلت على الباب .. ما ظل أحباب .. يا ساقي الماي
يلي أجاك البين .. علمنا أهلك وين .. يا ساقي الماي
